Politics Rwandan

Yifuzaga imbunda yo kurasa abamwiciye: Ubuhamya bwa Mukaribera warokotse Jenoside

by admin on | 2024-04-10 13:53:36

Share: Facebook | Twitter | Whatsapp | Linkedin Visits: 138

---

Ubu ni ubuhamya bwa Mukaribera warokotse Jenoside. Jonoside yakorewe Abatutsi mu 1994 ni amateka atazibagirana mu Rwanda ndetse no ku Isi yose. Yasize agahinda n’ubuhamya bugoye ku bayirokotse. Mukaribera Françoise ni umubyeyi warokokeye Jenoside yakorewe Abatutsi muri Repubulika Iharanira Demokarasi ya Congo kuko ariho yahungiye avuye mu Bugesera. Avuga ko ubwo Jenoside yahagarikwaga yumvaga yahabwa imbunda akivugana abamwiciye, dore ko umuryango we wose wari umaze kwicwa.

Yavuze ko ivangura ryatangiye kera, ubwo mu mashuri babasabaga kuzamura intoki buri uko bavuze ubwoko buri umwe yisangamo, yataha akabaza ababyeyi be icyo bivuze, ntibamuheho amakuru yifuza. Ati “Igihe cyaje kugera mbona icyo bashakaga.” Jenoside yakorewe Abatutsi mu 1994, igahitana ubuzima bwa benshi, yabaye Mukaribera atakiba iwabo kuko yari yarashatse umugabo.

Ati “Nari maze umwaka umwe narashatse, ab’iwacu banyuzeho barimo bahunga bagana mu rusengero rw’i Nyamata kuko bizeraga ko nta wari bubicireyo. Baje kunsezera mbasaba ko bansigira umwana umwe akaba urwibutso [nanjye ntazi ko nzarokoka]. Umuryango wanjye barawutsembye, data na mama n’abo navukanaga na bo bose barabishe.” Yakomeje agira ati “Bakomeje nanjye barampiga, naje guhungana n’abandi ngera muri Congo [RDC].” Mu buhamya bwe, Mukaribera agaragaza ko mu rugendo ahunga yahuye n’ibibazo byinshi aho avuga ko “Mbere yaho nageze i Gitarama umuntu arambwira ngo ngwino nguhishe urarokoka. Sinari nzi icyo ashaka, ariko yamfashe ku ngufu, arangije ibyo arambwira ngo ngaho genda.”

Nyuma yo kwinjira muri Repubulika Iharanira Demokarasi ya Congo, Mukaribera yabayeho mu buzima bubi bigera ku rwego atangira kwibaza ngo “Njye nasigariye iki kuri iyi Si?” Igihe cyarageze abari barahungiyeyo basabwa guhunguka bakagaruka mu Rwanda. Kuri Mukaribera, ngo byari bigoye ariko yageze aho ava ku izima yemera gutaha.

Ati “Na byo byabaye urugamba kuko numvaga ntashaka kugaruka ngo mbonane n’abishe umuryango wanjye. Igihe cyarageze ndagaruka, ngaruka mu nzira ndya imizi y’ibiti, inzara ari yose. Ariko Imana yakomeje kundinda. Ngeze mu Rwanda nabwo nakomeje kubaho nabi, kwiyakira biranga, nzana umujinya. Numvaga ko uwo ari we wese uri mu Rwanda mfite imbunda namurasa, gusa ubwo bushobozi sinari mbufite.”

Mukaribera yavuze ko nyuma yo kugaruka kwe mu Rwanda, atigeze abana n’abantu ahubwo yahoraga yigunze. Ati “Aho nari ndi nta n’ubwo nari mfite aho ndambika umusaya.” Yakomeje avuga ko Leta y’ubumwe yamuhinduriye ubuzima, ikamwubakira inzu, ariko n’ubundi ntiyayigiriramo amahoro kuko yari yarasazwe n’umujinya. Ati “Narwaraga umutwe udakira, najya kwivuza bakambwira ngo tuzakujyana i Ndera, nkabaza muganga nti ko nzi ko hajyayo abasazi ubu narasaze, na we akambwira ngo mfite ibibazo byinshi.”

Umujinya, uburakari n’ubwigunge bwa Mukaribera, byaje kumarwa na gahunda yazanywe mu Bugesera, yo “Komora ibikomere n’Isanamitima mu Banyarwanda”, ihuza abishe muri Jenoside yakorewe Abatutsi n’abiciwe. Yibanda cyane ku kubaka ubudaherwa bw’Abanyarwanda binyuze mu mibanire y’abantu, kwita ku buzima bwo mu mutwe, gufasha mu gutegura abagororwa gusubira mu buzima busanzwe no kuzamura ubushobozi bw’abantu mu by’ubukungu. Mukaribera yagize ati “Naje kubona abatanga ibiganiro, baraza bambwira ko hari aho ngomba kuba nkakirira mu muryango wa ‘Mvura Nkuvure’, ariko nkibabona numvaga ntacyo nshaka kubavugisha kuko nahoraga ncecetse.”

Uyu mubyeyi yafashe icyemezo cyo kugana uyu muryango atabishaka, ahurirayo n’abandi barokokanye, ariko na none ababazwa no guhurirayo n’ababahemukiye. Ati “Ikintu cyaje kongera kumbabaza, nasanzeyo na ba bandi batwiciye. Naguye mu kantu ndavuga nti akanjye karashobotse, menya ari ho bagiye kongera kunyicira.” Yakomeje agira ati “Si ko byagenze ahubwo nahigiye kubabarira. Iby’umutekano nari narabuze muri njye, ariko mu byumweru 15 twize, mu cya gatatu ni bwo twari mu ruziga, mbonamo umusaza Gatanazi, arambwira ati ndagusaba imbabazi, ndamubaza nti z’iki? Arambwira ngo nishe murumuna wawe.”

“Akimara kubimbwira numvise ntazi uko mbaye, kwiyakira biranga, ntaha nta mutekano mfite. Ariko twongeye kugaruka ku kindi cyumweru ni bwo natangiye kumva kubabarira ari bwo binjemo, numva ko ngomba kubana n’abantu bose amahoro kuko hari n’uwo nari narababariye ataranansaba imbabazi.” Mukaribera yavuze ko kumenya aho umuvandimwe we yiciwe n’uko yishwe biri mu byamugaruriye amahoro “kubera ko hari n’abandi twari twarabuze irengero ryabo.” Ati “Gatanazi namuhaye imbabazi nivuye inyuma turiyunga, muri uyu muryango ni ho naruhukiye. Nahasanze ababyeyi nibonamo, barumuna banjye, Mvura Nkuvure yaramvuye koko.”

Gatanazi wabanye mu muryango wa Mvura Nkuvure n’uwo yiciye mu 1994, yagaragaje ko yamaze imyaka umunani afungiwe ibyaha bya Jenoside, ariko nyuma yo kurekurwa, yumvise agomba gusaba imbabazi abo yahemukiye kuko yari yarabuze amahoro y’umutima. Ati “Nahagurutse mu bantu mubwira ko namwiciye umuvandimwe, ampa imbabazi turahoberana. Ubu turatuje neza nta kibazo, turasurana tugasuhuzanya kandi ni ukubera Leta nziza. Ubu mfite umutekano mu mutima.

www.andika.rw

Marc N

Inkuru Ziheruka

ABAYISILAMU BO MU RWANDA BIZIHIJE EID AL-FITR

https://www.andika.rw/news-details.php?nid=86

Abarimu bashaka kongererwa inguzanyo idatangirwa ingwate bahawe igisubizo

https://www.andika.rw/news-details.php?nid=85

Imigani MIgufi

https://www.andika.rw/news-details.php?nid=6

ibisakuzo

https://www.andika.rw/news-details.php?nid=5

Imvugo zikoreshwa ku ngoma( Umwami)

https://www.andika.rw/news-details.php?nid=7

End@@